Kutoka Kayenze.
Eliana binti jasiri na mama wa mtoto mmoja mwenye moyo wa kupambana. Maisha hayakuwa rahisi kwake; alikabiliana na changamoto nyingi akiwa na majukumu ya ulezi akiwa bado mdogo. Lakini ndani yake kulikuwepo ndoto ambayo hakuwahi kuizima ndoto ya kuwa mtaalamu wa urembo.

Kupitia mafunzo aliyopata kutoka Shirika la Msichana Tai, Eliana alipata nafasi ya kipekee ya kujifunza sanaa ya kusuka nywele na kufanya makeup. Mafunzo hayo hayakumpa tu ujuzi, bali pia yalimjengea imani, ujasiri, na dira mpya ya maisha. Aligundua kwamba mikono yake inaweza kuwa chombo cha ubunifu na chanzo cha kipato.

Leo hii, Eliana anatoa huduma za urembo katika jamii yake ya Kayenze. Wateja wake wanatoka mbali na karibu, wakivutiwa na ubora wa kazi yake na tabasamu lake linalotia moyo. Kupitia kipato anachopata, anaweza kumtunza mtoto wake na kutimiza mahitaji ya kila siku.

Ndoto yake sasa ni kufungua saluni yake ya kisasa mahali ambapo si tu atatoa huduma, bali pia atawapa wasichana wengine nafasi ya kujifunza na kujitegemea kama yeye.

Eliana anasema kwa tabasamu, “Msichana Tai ilinipa nafasi ya kuamini kwamba hata kutoka kijijini, msichana anaweza kung’aa kama nyota.”